Balai Garegeh Linteh Generasi, IKESMA 7 Juli

Sebuah ulasan menarik babahaso awak dibuek dek kanda Dody Mardanus, alumni Angkatan 75 (Kelompok Sago Sakato) – beliau juga adalah Alumni Universitas Indonesia dan Wartawan Senior berskala Nasional. Perhatiannya terhadap kegiatan IKESMA sangat intens, bahkan boleh diberi derajat “istiqomah” – beliau suka sekali menulis aneka kegiatan IKESMA dengan gaya bahasa yang renyah dan gurih serasa batiah, legit bak gelamai, nikmat bagaikan gulai gajeboh dan terkadang pedas layaknya “sambalado tanak” – (baca sendiri aja deh…)

OLEK kito nan sarupo ari Akaik kapotang tu, sasuai jo namonyo, adonyo iyo sataun sakali nyo. Khususnyo nan di Jakarta. Nan balangsuang di ‘kantua-kantua cabang’ Ikesma, manjalang iko, lai tadonga hajatan sarupo di Pikumbuah. Dibuek dek Kabua Saiyo (veteran G.76—G.83), dihadiri sakiro 100 alumni. Artinyo, saparo dari nan bakumpua di Auditorium Gedung D Kementan, Ragunan, 7 Juli 2019. Baa dek baitu? Supayo joleh, silakan manyimak baliak buku atau artikel-artikel Prof. Mochtar Naim tontang perspektif marantau dalam inner drive budaya masyarakaik Minangkabau.

Wakatu ritual tahunan sarupo iko (lazimnyo memang baitu-lah) dibuek ndak talalu jauah ba’da bulan suci Ramadhan. Tema godangnyo disangkuikkan ka kapstok psikologi religio-sosial: Halal bi Halal. Tradisi silaturahim elegan nan ndak ka tasuo di komunitas umaik Islam lain di mano pun di sapapak’an bumi, tamasuak di kampuang halaman nagari-nagari unto. Sangaik khas Tanah Air. Sabona Indonesiawiyah.

Acara taun lalu maambiak tompek di Aula Sarbini, Taman Wiladatika, Cibubur, 29 Juli. Nan kini, Akaik, 7 Juli, ontah apo sababnyo (mungkin etong-etongan keekonomian nan dikombinasian jo ‘tanggal cantik’ 0707), olek Ikesma dibuek pas bona di balakang habitat ‘niniak muyang’ 🙂 , Jl. Harsono RM No. 3, Ragunan, Jakarta Selatan. Tatulih di back drop pangguang: “Bakumpua Basuo Manjalin nan Taurai” Alumni SMA 1/SMPP 25 Payakumbuh. Sanyampang ambo ndak salah, baru sakali ko tasobuk istilah “SMPP 25 Payakumbuh.”

Whatever. Hadlirin, manuruik nan tacatat di Buku Tamu, lai 175 urang. Pasti lobiah 200 kok dietong jo Panitia, nan lah sibuk maurus babagai parsiapan inyak etan sijak malam sabalumnyo.

Desain ruangannyo cukuik oke untuak kumpua-kumpua. Sobab—iko penting—salain ruang utamo nan ‘sakral’, di sabolah balakangnyo ado tompek untuak komunitas kereta api/ahli hisap.

Run down acara pun longkok gonok. Ado tari piriang, lagu ‘kebangsaan’, door prize, penghargaan ateh jaso-jaso spesifik untuak babarapo figur, dan–sarupo nan talalah—ditutuik jo badendang Kim di pangujuang kumpuakumpua. Istilah kami di Palanta 75: “ngopi-ngopi” 2-3 bulanan. Sayang saketek, suaro nan kalua dari sound system agak malobiahi limitasi desibal nan lazim ditoleransi dek ukuran talingo standar. Talobah katiko manyalonong MC ‘sopir tembak’ nan baciloteh satangah maoriak-oriak. Mungkin dek ndak mangaroti fungsi inyo sabagai supporting MC, atau olun ba-sertifikat MC, inyo pikia kaduduakannyo sadarajat pulo jo MC ‘batangan’, rang padusi nan lah batugeh di ruangan tu sijak jolong acara.

Menu maksi tagolong biaso-biaso sajo. Pas-pasan. Goreng boluk jo sapek monuang campua joriang. Kombinasi menu itu banyak saketek lai totap ‘sukses’ manyampaikan posan sambia mampajoleh aura menu nan khas Pikumbuah. Tapi, agak kalah set dibandiang seronok gaun ijau-ijau merah-merah, longkok jo suntiang ketek di kapalo, nan dipakai dek uwo-uwo ataupun kalompok panari piriang. Mancoliak parade uwo-uwo basuntiang di babagai tumpak ruangan utamo aula tu, khas bontuak pagar ayu di acara walimahan, agak wajar rasonyo awak saraso hadir di tompek urang barolek. 🙂

Nan agak istimewa manuruik ambo (subyektif) adolah mancoliak uwo-uwo senior balalu lalang kian ka mari. Di dadonyo tatempe tulisan (Angkatan) 61-62-63. Di umua 74-76 taun, mereka masih segeh bona. Mandiri. Bajalan sorang. Ndak batungkek. Ndak babimbiang. “Amak ko angkatan 61, Mak?” Dijawabnyo, “Iyo, Diak”. Salidik punyo salidik, tanyato ado nan lobiah senior dari uwo-uwo tadi. Baliau Angkatan 58 (Tuo Sepakat), generasi partamo SMA kito. Baliau mangaku Ketua Ikesma partamo, duo periode/8 taun. Ambo lupo mancatat namo liau. Kalau ndak salah namo balakangnyo… Darwis. Kondisi fisik liau lah agak guyah, lah manggigia kaduo tangannyo, untuang sayuik-sayuik masih bisa mandanga. Maklum, umua baliau kok ndak 79, pasti 80 atau lobiah. Artinyo, kloter SMA/SMPP nan tamaik tarakhir (Srikayo) adolah alumni nan statusnya cucu Ikesma 🙂

Resminyo, pangguang ko hanyo wahana untuak kaparoluan internal Ikesma. Tapi lumayan manjadi colourful dek di acara tu hadir Wako Pikumbuah, Riza Falepi, ST, MT. Ndak pacuma inyo barangkek dari rumah pukul 3 subuah, tabang jo pasawat partamo, konai macet dari tompek transit di Jakarta ka TKP di Ragunan. Ampia jam 12 baru marapek. Langsuang diagiah mikrofon dek Panitia. Riza nan kini manjabaik Wako periode kaduo (sijak 2017) bacarito tontang hasia kojo salamo 7 taun, maadok’i duo masalah nagori nan serius: kamiskinan jo katartinggalan. Disobuknyo, antaro lain, kini jumlah tamatan SMA Pikumbuah makin saketek nan ditarimo di universitas2 godang di Jawa; situasi nan balain bona dibandiangan jo babarapo taun nan lampau.

Salain bla-bla-bla carito itu, tontu sajo forum Ikesma ko indak lupo ‘dipagunokan’ dek Datuak Rajo Kaampek Suku tu untuak manyampaian makosuk mampaloweh wilayah pangabdian, di taun 2010. Sasudah duo periode Irwan Prayinto, kurisi BA-1 parolu kito nan maambiak. Lah masonyo kini putra Pikumbuah nan duduak di sinan, kan? Kok ndak kini, bilo juo lai? Ilang momen, susah pulo mandapek’annyo baliak— mumpung bobot pasaiang riil buliah dikatoan ndak ado nan borek bona.

Ide rancak ko insyaa Allah basambuik positif dek kaluarga gadang Ikesma di Batavia. Salanjuiknyo tingga mambunyiannyo sajo baelok-elok ka sagalo dusanak, kawankawan, tetangga awak suok kida nan tingga di kampuang. Artinyo, lah botua angku Riza basingajoan malangkah ka Jakarta (maagiah sambutan plus mandendangkan lagu dangduik ‘Terajana’ Ikke Nurjanah) untuak malantak Bola-1 di ateh meja supayo lakak-malakak di antaro bola-bola tu, nan ujuang-ujuangnyo mandorong Bola-9 masuak lubang. Kok parmintaan ko lai dijabah dek Nan Di Ateh, bialah angku Erwin Yunaz malanjuikkan kapamimpinan Kota Pikumbuah hinggo taun 2022.

Saumpamo acara tu dijadwalkan di ari nan lain, ndak di tanggal 7 Juli tu, alumni nan sempat hadir tontu lobiah banyak. Masalahnyo, akses ka arah Ragunan dari sagalo arah lua biaso macet. Anak sikola, masyarakaik umum, ontah apo sobab, baturo-turo ka Kabun Binatang di ari itu. Mako ndak saketek konri-konti nan barangkek pagi baru tibo di sinan lah tongah ari. Ado nan lah di pangujuang acara bagai baru mancogok. Pukul tigo kurang saparompek kaleng Kim dikuncang. Kotu nan pas bona pulo jo jawaban ‘oke’ dari Go-ride Gojek untuak ambo babaliak pulang.

*Balai garegeh atau pasa garegeh atau pokan garegeh tu mungkin agak khas istilah kami di Mudiak. Maireh-ireh buah-buahan nan babuah di musim solek, sainggo buah nan dihasiakan dek batang tu biasonyo ndak talalu banyak tapi (lobiah) boneh.

Tinggalkan Balasan